Бяспечны шлях у “Падарожнік”
Яшчэ не паспеў пажарны аўтамабіль выехаць за тэрыторыю часці нумар 2 Маладзечанскага ГРАНС, якая знаходзіцца ў пасёлку гарадскога тыпу Радашковічы, як міма праходзячыя дзеці запыталі: “А што здарылася? Куды вы паедзеце?”.
- У нас запланаваны бяспечны шлях у “Падарожнік”, – адказалі выратавальнікі.
Як правільна выклікаць выратавальнікаў? Што рабіць, калі ў доме або кватэры здарыўся пажар? Якія сітуацыі называюцца надзвычайнымі? Адказы на гэтыя і іншыя пытанні атрымалі хлопчыкі і дзяўчынкі, якія адпачываюць у дзіцячым аздараўленчым лагеры “Падарожнік”, што ля Радашковічаў. Акцыю “Канікулы без дыму і агню” для іх арганізавалі супрацоўнікі Маладзечанскага горрайаддзела па надзвычайных сітуацыях.
Ратавальнікі правялі вучобу ў даступнай і цікавай форме – праз конкурсы і гульні. Але спачатку выхаванцаў лагера чакала захапляльнае выступленне лялечнага тэатра “Батлейка” горада Маладзечна. “Непаслухмяная запалка” сваім прыкладам паказала, что гульня з агнём можа прывесці да вялікай бяды.
Дзеці прымяралі на сябе экіпіроўку выратавальніка – задача зусім не простая, складвалі пазлы на супрацьпажарную тэматыку…
У час мерапрыемства юныя ўдзельнікі даведаліся, што супрацоўнікі МНС па трывозе павінны падрыхтавацца да выезду на месца пажару або іншага здарэння ўсяго за 34 секунды. Калі здарылася надзвычайная сітуацыя, тэлефанаваць трэба на “101” або “112”. Пры гэтым неабходна дакладна назваць адрас, дзе чакаюць дапамогу і падрабязна расказаць дыспетчару, што здарылася. Ад гэтага залежыць жыццё чалавека.
Важатыя таксама не засталіся без увагі. Пасля асноўнага мерапрыемства з імі асобна быў праведзены ўрок бяспекі. Інспектары группы прапаганды і навучання падрабязна растлумачылі, як трэба дзейнічаць у выпадку пажараў і іншых надзвычайных сітуацыях, калі ты нясеш адказнасць за вялікую колькасць дзяцей. Паўтораны правілы выкарыстання пярвічных сродкаў пажаратушэння, якія знаходзяцца ў арсенале пансіаната, такіх як парашковы вогнетушыцель і пажарны кран.
Усе ўдзельнікі мерапрыемства атрымалі каштоўныя падарункі. Напрыканцы сустрэчы дзеці паабяцалі выконваць правілы супрацьпажарнай бяспекі, берагчы сябе і слухацца парад выратавальнікаў.
Па статыстыцы, у час летніх канікул юныя жыхары горада і раёна маюць больш шанцаў стаць ахвярамі пажараў і іншых надзвычайных здарэнняў, таму задача выратавальнікаў – наведаць усе лагеры, якія дзейнічаюць на тэрыторыі Маладзечаншчыны, стварыць трывалы багаж ведаў, які абароніць хлопчыкаў і дзяўчынак ад непрыемнасцяў.
